ARCSAR-imi attaveqaqatigiinnut GOSR avataaneersutut siunnersuisunngorpoq

ARCSAR-imi attaveqaqatigiit tassaapput suleqatigiit 21-it nunanit assigiinngitsunit 13-ineersut. Attaveqaqatigiit EU-mi Horizon 2020-imi piffissami 2018-miit 2023-mut ukiuni tallimani ilisimatusarnermut nutaaliornermullu pisussanut pilersaarummit aningaasalersorneqarluni pilersinneqarpoq.

Soqutigisaqartut, SAR-imik aallussaqartuneersut, suliffissuarneersut aamma issittumi atlantikullu avannaani ilisimatusarnermi suliaqartut ARSCAR-imi attaveqaqatigiit ataatsimoortippai. Nunap immikkoortuani suliaqartut isumannaallisaanermi navianartorsiortitsisunik, qanoq pisoqaraluarpalluunniit nunap immikkoortuani niuernermik tunngaveqartumik suliaqarnerulernerup kingunerisaanik pilertussanik, pitsaanerusumik iliuuseqarfiginninnissamut piareersarnissaq, ARCSAR-imi attaveqaqatigiit siunnerfiginiarpaat. Ilanngullugu umiarsuit takornariartaatit angallannerulernerat aammalu sinerissap avataani uuliasiorluni gassisiorlunilu suliaqarnerulernerit.

SAR-ip aammalu uuliakoornermi upalungaarsimanerup iluani nutaaliornermik pisariaqartitsisoqarnersoq ilaatigut ARCSAR-imi attaveqaqatigiit paasiniassavaat. GOSR 2019-imi oktobarimiit ARCSAR-imi attaveqaqatigiit siunnersuinermut komité-anni avataaneersumi ilaalerpoq.

Paasissutissat annertunerusut uani takukkit: https://arcsar.eu/

 

GOSR-ip eqimattani aqutsisunut IMO-mit akuersissummik allagartaqartunut pikkorissaaneq ingerlappaa

Eqimattani aqutsisunut IMO-mit (International Marine Organization) akuersissummik allagartaqartunut pikkorissaaneq ‘IMO Level 2 – Response to Oil Spills for Supervisors and On-Scene Commanders’ Greenland Oil Spill Response A/S-ip ukiorpassuarni suleqatigisani BluePetrel Ltd. peqatigalugu ingerlappaa. . Pikkorissaaneq Nuummi 2019-imi ulluni septembarip 29-aniit oktobarip aappaata tungaanut ingerlanneqarpoq.

Uuliakoornermi upalungaarsimanermi iliuusissanik ataqatigiissaarineq, eqimattani aqutsisup suliassaasa pingaarnersaraat. Tamatumatigut eqimattani aqutsisoq ilaatigut uuliakoornernut suugaluartunut tamanut akiuiniarnermi periusissiamik pitsaanerpaamik suussusersiisinnaallunilu aallarnisaasinnaassaaq.

Pikkorissaaneq atuagarsorluni atuartitsinermik kiisalu ullut marluk suliaqarluni sungiusarnermik imaqarpoq. Uuliakoortoqarsimatillugu sineriammi aaqqissuussineq saliinerlu pillugit ullormi siullermi sungiusartoqarpoq. Imaani assiaqutinik puttasulersuinermik angallatillu marluk akornanni inissitsiterisinnaaneq pillugu ullup aappassaani sungiusartoqarpoq. Pikkorissaanermi peqataasut arfineq marluk pikkorissarneq naammassivaat.

Ilanngullugit Greenland Oil Spill Response A/S-imeersut sisamat pikkorissaqataallutik aammalu Namminersorlutik Oqartussat ataanni suliamut attuumassuteqartumi susassaqarfinneersut pingasut pikkorissaqataallutik.