Naalakkersuisut aamma Sakkutooqarfik Kalaallit Nunaanni imaani avatangiisini upalungaarsimanerup nakussassarneqarnissaanut atatillugu isumalluutinik ataatsimoorussinissaq pillugu suleqatigiinnissamut isumaqatigiissuteqarput.

Naalakkersuinut isumaqateqarneq malillugu Greenland Oil Spill Response A/S isumaqatigiissutip suliaqarnikkut atuutsinneqarneranut akisussaasuussaaq. GOSR ilaatigut makkununnga ikiuutissaq:

  • GOSR-imi pigaartut oqarasuaataannut 24/7 attaveqarsinnaaneq,
  • GOSR-ip atortuisa Kalaallit Nunaannut Sakkutooqarfiup imaani avatangiisini upalungaarsimanermut pilersaarummi ilanngutsinnissaannut pisinnaatitaaneq,
  • Sakkutooqarfiup imaani avatangiisini mingutsitsinermik akiuiniarnissamut atortuinik GOSR-ip suliaqarnermini aallaavigisaanni (maannakkut Nuummi aamma Aasianni) uninngasuutiginninneq,
  • GOSR-ip suliaqarnermini aallaavigisaanni Sakkutooqarfiup imaani avatangiisini mingutsitsinermik akiuiniarnissamut atortuinik nalinginnaasumik aserfallatsaaliuineq aamma sullissineq.

Tamatuma saniatigut Sakkutooqarfiup aamma GOSR-ip upalungaarsimanermut aaqqissuussaanerani nammineq kajumissutsiminnik sulisut akornanni ataatsimoorluni sungiusaqatigiinnissamut isumaqatigiissut periarfissaqalersitsivoq.

Greenland Oil Spill Response suleqatigiinnissamut qilanaartorujussuuvoq.

Recommended Posts